حوزہ نیوز ایجنسی کی رپورٹ کے مطابق، حوزہ علمیہ ایران کے مرکزی انتظامی ادارے (مرکزِ مدیریتِ حوزہ ہائے علمیہ) نے ایک بیان میں ایرانی عوام کو انقلابِ اسلامی کی سالگرہ کے موقع پر 22 بہمن کی تاریخی ریلی میں بھرپور شرکت کی دعوت دی ہے۔ بیان میں کہا گیا ہے کہ عوام کی پرجوش موجودگی ملک کی وحدت، خودمختاری اور استحکام کا واضح پیغام ہوگی۔
بیان کا آغاز قرآنِ کریم کی آیت سے کیا گیا، جس میں ایام اللہ کی یاد دہانی کی اہمیت بیان کی گئی ہے۔ مرکزِ مدیریت کے مطابق، عشرہ فجر کے ایام ایرانی قوم کی اس بے مثال جدوجہد کی یاد دلاتے ہیں جس کے نتیجے میں امام خمینیؒ کی قیادت میں استبداد اور عالمی استکبار، خصوصاً امریکہ کے تسلط کا خاتمہ ہوا اور ملک نے عزت، آزادی اور خودمختاری کی نئی راہ اختیار کی۔
بیان میں کہا گیا کہ انقلابِ اسلامی اپنی 48ویں سالگرہ کے قریب ہے اور اس موقع پر دشمن ایک بار پھر ایران پر غلبہ حاصل کرنے اور اس کے وسائل لوٹنے کے خواب دیکھ رہے ہیں۔ مختلف سازشوں کے ذریعے عوام کے حوصلے توڑنے اور ملک میں عدم استحکام پیدا کرنے کی کوششیں کی جا رہی ہیں، تاہم ایرانی قوم نے ہمیشہ ان سازشوں کو ناکام بنایا ہے۔
مرکزِ مدیریت نے کہا کہ ایران کے باشعور عوام اور نوجوانوں نے طویل عرصے تک آمریت اور استعمار کے مظالم برداشت کیے اور ہزاروں شہداء کی قربانیوں کے ذریعے آزادی حاصل کی۔ یہی وجہ ہے کہ آج وہ کسی بھی صورت بیرونی طاقتوں کو اپنے مستقبل کا فیصلہ کرنے کی اجازت نہیں دیتے۔
بیان میں اس بات پر زور دیا گیا کہ رہبرِ معظم انقلاب کی قیادت میں عوامی اتحاد اور قومی یکجہتی نے دشمنوں کے عزائم کے سامنے مضبوط دیوار قائم کر رکھی ہے۔ حوزہ ہائے علمیہ کو انقلاب کے فکری اور ثقافتی محافظ قرار دیتے ہوئے کہا گیا کہ علما ہمیشہ عوام کے شانہ بشانہ کھڑے رہے ہیں اور دشمنوں کی سازشوں کے خلاف صفِ اول میں کردار ادا کرتے رہے ہیں۔
مرکزِ مدیریت نے عوام سے اپیل کی کہ وہ 22 بہمن کی ریلی میں بھرپور شرکت کر کے ایک بار پھر اپنی طاقت، وحدت اور عزم کا مظاہرہ کریں۔ بیان کے مطابق، یہ عظیم الشان شرکت دنیا کو واضح پیغام دے گی کہ ایرانی قوم اپنے دین، آزادی، خودمختاری اور اسلامی نظام کے دفاع سے کبھی پیچھے نہیں ہٹے گی۔
آخر میں کہا گیا کہ آج پوری دنیا ایرانی عوام کے انقلابی جوش و جذبے کی گواہ بنے گی، اور یہی اتحاد و استقامت ایران کی ترقی اور انقلاب کی کامیابی کا راز ہے۔
آپ کا تبصرہ